bisan kanus-a wala siya makigsangka kanimo

gidalhan ka niya og
usa ka pungpong nga hinog
kaayo nga bayabas
naunsa ka man
nganong imo man
kining giyatakyakan

pagkaugma tungod lagi
kay iya ka mang pinangga
gidalhan ka na pod niya
og usa ka pungpong nga
pula kaayong mga rosas
naunsa ka man nganong
imo mga kining gilabay
sa basurahan

miluhod siya kanimo
aron sa pagpangayo og
pasaylo apan naa ka
pagkawalay puangod
nganong imo man
siyang gilud-an?

dili nako mabasol ang
iyang mga tiil nga
mitindog og dayon
og lalin
dili nako mabasol ang
iyang mga kamot
nga misulod na lang
sa iyang mga bulsa
og ang iyang baba
nga mitak-om og
ang iyang kasingkasing
nga miloom na lang sa
tanan

kagabii nakigsulti siya
sa bulan og
gihatag na kaniya ang
iyang kagawasan

karon adlawa gibukhad na
niya ang iyang mga pako
gialisdan ang iyang mga
bukton og iyang gitaktak
ang tanang mga abog
sa iyang mga bagtak
og lapalapa
ang tanantanan gayod
nga may kalabotan
kanimo

ikaw na lang usa
hala ipadungog sa tanang mga kahoy
ang imong kusog nga katawa

kay bisan kanus-a ang tawong
nahigugma sayod ka gayod kaayo
wala kini makigsangka kanimo