Hubo ako nga miabot
Og ako miiyak, mityabaw.
Hubo ako nga mogikan
Dili ako moiyak
Mamahimong ako
Magpakahilom
Uyon sa kilomkilom
Mamahimong ako
Manghulam sa usa ka
Pahiyom
Nga anak sa lunsay
Nga kahilom.
Mamahimong ako
Dili mamakak
Sa akong kahadlok
Sa akong kabalaka
Nga dili ako madawat
Ni Bathala
Ako ang balak
Ako ang akong halad
Ako ang akong kalag
Bathala, Lingi Kanako
Ipakita ang Imong Pahiyom
Ipakita bisan na lang ang imong Anino
Ihatag ang kahayag
Bisan og kahayag lang sa usa ka aninipot
Sakto na kana kanako
Mosunod ako kanimo
Ikaw Bathala ang naghatod kanako dinhing lugara
Ikaw Bathala sa ngalan sa Gugma ang mokuha kanako
1 comment:
mao gyud tingali sir~
mao nay mas labing insaktong tumong...
salamat sa pagshare nimo sa imong balak.
Post a Comment