pagpanilhig sa atong nataran

manilhig lang pod ta seguro
sa atong nataran
mamati usahay sa ilang pagsaway

tan-awa daghang sagbot
nanubo ang mga salibotbot
basin kinahanglan na pod nga
kita dili lang magbagotbot
kon dili angayan na usab
nga kita mangibot og dili
lang mangambot

manilhig na ta sa atong tugkaran
aron dili na kita masawayan

putlon ta ang mga tag-as na kaayong
mga dila sa atong balilihan
patagon ang mga bondo nga
kabukiran
diha sa atong nataran

og kanang bukog nga anaa sa imong
tutunlan
panahon na segurong ipakawras
sa iring aron ka na matangtang

og kanang tunok sa imong
lapalapa panahon na segurong
imong ihian
imong ibton kay basin
mahubag og mao lay
unyay kaputlan sa imong
tiil og hinungdan
sa imong
hinanaling kamatayon

og kanang kutsilyo nga nagtaop
sa imong dughan lapos sa imong
kasingkasing nga nagdugo
panahon na segurong atong
tangtangon o
ibton

panamin, luspad ka na kaayo
pahikapa ko sa imong agtang

buhi pa ba ka?