daghan ang mga butang
nga mosiplit
nga mosiplit
gusto natong pasipliton
ang hubag aron
mawa ang nana nga bisan
sakit apan kinahanglan
aron makab-ot
ang kaayohan
sa kadako sa akong gugma
kanimo
nagpunay akong pasiplit
sa akong pasiplat
apan imo lang kining
giwagtang sa usa
ka paghangad
sa mga panganod
og sa akong pagpangita og
kaayohan
dili mo ako mabasol niining
akong pagpasiplit
diha sa kawanangan
tumong sa mga bitoon
giapil ko ang akong mga laway
ang akong mga singot
kay sa akong dakong gugma kanimo
og sa imong paglingo-lingo
ang pagpasiplit na lamang
ang kaayohan nga nahibilin alang kanako
dili ako gustong mabuang og dili pa usab ako gustong mamatay
No comments:
Post a Comment