sa gahom sa ilang mga laway

naghisgot ka sa usa ka nilalang
nga nananghid nga mosulod sa pultahan
sa usa ka bato

nga diin ang bato miingon nga dili
siya magpasulod kay wala siya'y pultahan
kay wala siya'y lawak kay wala siya'y hawanan

og miingon ka nga aduna kini hawanan
sa usa ka dahon tapad sa usa ka tulo sa tubig
nga bisan ang bato mismo ang wala masayod niini

mibalibad gihapon ang bato og mihisgot
nga dili gayod siya magpasulod kang bisan kinsa
labi na kanimo nga walay sinati nianang pakig-ambit
nianang pakigsandurot

mihangyo ka tungod sa imong kahimtang
tungod kay nag-ung-ong na ang kamatayon sa imong
baba og ikaw dili na gayod makaantos sa pagpakahilom

gipasa ka sa dahon og ang dahon mipasa sa imong hangyo
didto sa tulo sa tubig, og gipasa ka na usab sa bato nga
walay pultahan, mibalik ka sa paghangyo nga unta
pasudlon ka na sa pultahan nianang bato

nga nagpunay gayod og balibad. wala gayod diha ang
pagsinabtanay. Yano lang ang kinabuhi. Gani nganong
libog-libogon man gayod nato ang atong kinabuhi.

kon ako pa kadtong nilalang nga hingtungdan, usa lang
ang akong buhaton. Pila ra goy pagpunit sa maong bato
og dayon og labay niini ngadto sa dagat. Tan-awon ta
kon makabalibad pa ba siya didto sa lalom kaayo nga
kahilom didto sa salog sa mga lawod, tapad sa mga balas
og mga kinason nga nagsigig nganga nga kuno nanaghimo
og mga perlas pinaagi lamang sa gahom sa ilang laway.