sa akong gamay nga kalibotan

sa akong gamay nga kalibotan
mibalak ko
duha ra ang akong mambabasa
ang ikatulo
ako

sug-ang
nagsinug-ang mi
nagtak-ang mi sa among kaldero nga itom
kaayog lobot

kanang among mga pangandoy
among gilunod didto
ang tanan tanan gayod
gisugnoran namo sa among mga ginit
nga kakugi
og mga takong sa kamingaw

mibukal ang among mga pagbati
og naluto ang among mga damgo

pagsukad namo sa lamesa
nga sa among tan-aw
sakto ra unta sa pagkaluto nga nilung-ag

mipunit ang among halangdong bisita
og usa ka kutsarita
gitilawan sa iyang taas nga dila
miusap
mipiyong iyang mga mata og
dayon og kusmod sa iyang nawong
og miingon

"hilaw pa"

mitan-aw kanamo og otro

"itak-ang og balik
kay hilaw lata
ang inyong nilung-ag"

og kami usab nga gusto lipayon siya
mipatoo
nagdalig tak-ang pagbalik
sa among nilung-ag

gibati ko og kakapoy
niining gamay kaayong kalibotan
sa akong balak

migawas ko sa balay
gibilin ko ang duha ka tigpamaypay
mihanggab ko sa hangin
gikan sa halapad kaayo nga patag

mitan-aw ko sa dagat sa unahan
og miingon:

"kinsa ba kadtong halangdon?
bisita lang siya
pwede man nako siyang palayason"

sa akong hunahuna
akong nilung-ag
akoy kaon

peste!yawa! pahawa!

mibalik ko sa akong agi
miabre sa akong pultahan
miatubang sa halangdon
nga nagpunay og tan-aw
sa akong palibot og
gusto pa untang manaway

mora bag gusto moingon
nga kuno ang akong sofa
nagkinahanglan ng
alisdan

"peste! yawa ka! pahawa.
pauli sa inyo
wala kay labot kanamo!

" sus inday, nahuwasan ko
kalipay ko ra nga ako ra og kita
niining atong gamay nga kalibotan
sa balak.

pila na ba ka baso nga luha
ang imong nalunod sa atong kaldero
nga itom kaayog lobot
og karaan?