ang hagwa

abi nimo ug wala ko kahinumdum
sa imong paghagwa kanako
ikaw mipahiyom og ako sama

sa usa ka basket nga gipuno nimo
sa mga bulak og mga prutas
mga bulak nga humot
sama sa kahumot sa imong aping
mga prutas nga tam-is
sama sa katam-is sa imong gininhawa

abi nimo og wala nako nakita
ang imong kalipay
sa imong pagpunay og hagwa kanako
nga mora ako og usa ka monyeka

og imong giawat-awat ang akong
mga yungit nga pagyubit sa imong ngalan

nalipay ka kanako og ako imong gilipay
mao kana ang akong dili malimtan
gidapion nimo ang imong agtang
sa akong agtang og ang atong
mga ilong nagsimhotay sa atong mga pagbati

abi nimo og akong malimtan ang tanan
ang kaanindot sa atong kinabuhi
bisan og walay gamitay sa pulong
gipaagi lamang sa paghagwa
nagkasinabot kita sa atong gugma

ako ang puya, og ikaw ang akong inahan
ikaw ang akong kinabuhi og
ako ang imong kagahapon