sa akong panimalay

sa akong panimalay daghan ang mga bintana
og mga pultahan og mga hagdan og busa
mamahimong mosaka ka nga walay pagpanuktok
og mosulod ka nga walay pagpananghid
mamahimong molingkod ka og mupahulay
og makigsulti sa mga kisame og bongbong
samtang wala pa ako
og makigharong sa lamesa og
makigsandurot og makighalog sa mga
lingkoranan

og kon moabot na ako
dalitan ko ikaw dili lang sa usa ka tam-is
nga pahiyom

mamahimong sa akong panimalay imo akong gakson
og hagkan og imong tilawan ang
akong kaayo og pagkamanggihatagon

og tungod kay daghan mang abri nga pultahan og bintana
gawasnon kang molantaw sa laing kalibotan
og mogawas sulod sa bisan asa nimo gustong adtoan

apan adunay usa ka pultahan nga sirado
og bintana usab nga siging panirado
adunay usa ka hagdan nga walay makasaka
og adunay lawak nga haskang ngitngita nga walay makasulod

ako lamang og ako lamang gayod

sama kini sa usa ka kahoy didto sa paraiso kaniadto
nga gihimo sa Ginoo
adunay prutas nga dili nimo makaon

ako lamang ang makakaon, og ako lamang gayod

diha sa lawak nga sirado, diha sa hagdan nga barado
ako lamang ang makasulod og ako lamang ang makasaka

ayaw pagtoo nga ako giganahan niining hitaboa.