maghalok ta

wala ko kaako og halok kanimo
diha sa sulod sa imong sakyanan

nagmaneho ka
tan-aw abtik sa kusog kaayo nga
pagbulusok sa ulan

palayo na kita sa Matina Square
paingon sa akong hotel


milikay ka sa unta
gusto natong mahitabo niadtong gabhiona

misulod ang daghang mga sambingay
sa akong hunahuna

unsa kaha kon mahimo akong buyog
og unya ikaw usa ka pula kaayo nga rosas

unsa kaha og nawala ko
og ikaw ang akong nakit-an nga nag-inosarang

mibukhad sa usa ka hardin
og nagkahimamat tang duha og ako

mitugpa diha sa imong mga gihay
og dayon nako og higop sa imong gitago nga nektar?

mikusog ang ulan
gitugnaw ko og akong gisaka ang zipper

sa akong itom nga jacket
hangtod sa akong liog og ikaw mitutok gihapon

sa atong agianan paingon sa akong hotel
sa waterfront

mihunong ka kadali
sa kilid sa dako kaayong kahoy nga akasya

dapit sa lugar diin wala na ang mga tawo
gitan-aw mo ako og imo akong gihagkan sa tamantaman

mao sab ang akong gipangandoy
og atong gipaduladula ang atong mga dila diha sa

atong mga ngipon og ang atong mga laway
misyagit sa kalami niining atong kinawatkawat nga

ginagmayng kalipay
wala maningog ang atong mga tudlo sa gilak sa atong

mga wedding rings
nagpabilin sila nga nagkasinabot sa pagpakahilom

nahitabo ang sunod nga mga panid sa atong kinabuhi
kanang dili na angay nga ikapanugid

kay lagi dili na angayan nga ikapanangpit pa sa uban
lami, lad-ang, asgad, aslom, tam-is lamog nga kapait og pilit-pilit

ang atong mga paghanduraw
sagol sa singot og mga agulo sa atong tagsa-tagsa ka

minyo nga kinabuhi
wala ko magbasol og andam akong mopahiyom lamang

kon iya akong sukitsukiton
kay sa tinood wala gayod ako mihalok kanimo

ikaw lang ang mihalok kanako
og igo lamang akong misukli sa akong mga utang kanimo

andam na ako sa akong mga sambingay
kabahin sa buyog nga nawala og sa mga gihay sa bulak sa rosas

nga igo lang nagtug-an kaniya sa dalan
pauli sa iyang balayan nga unta iya nang biyaan, kaniadto