Sa silangan ug sa kasadpan
Samtang ang mga bata
Sa silangan
Nagtampisaw sa
Pangaligo sa ilalom
Sa ulan
Nabibo ug dula
Gukod sa mga gagmayng
Tiil sa kalipay
Lahi usab didto
sa kasadpan
Diin ang pution nga
Tigulang
Nagpungko
Sa iyang pag-inusara
Namati sa tingog
Sa ulan
Gilantaw ang iyang
Pangahulog
Sa uga nga yuta
Nga sa makanunay
Nagpaabot ug
katapusan
sa pag-abot sa mga panganod
sa pag-abot sa mga panganod
sa ibabaw sa atop
sa akong mga panglantaw
dili ko na ilarawan pa ang kasubo
ug dili na ako mamati
sa ilang mga pagbakho aron
isugid ug imantala ko kini kanimo
dili ko na lantawon unya puhon
ang pagbaha sa mga
kasakit sa akong dughan
gastoso na baya kaayo
ang akong kasingkasing
gani nangagisi na ang
mga maayong panghunahuna
sa akong kinabuhi
nangaligti na usab ang mga ugat
sa akong mga pangwenta
hapit na mahilis ang akong mga mata
ug akong mga kamot ug mga tiil gusto
nang mokaratil ug dagan palayo kanako
panahon na sa pag-bag-o
pagalikayan na nako ang pagbago ug pagbagood
ang pag-aginod ug pag-agulo sa kasakit
sa kagahapon
apil na ang karon dayon
panahon na ang paglabay sa mga dahon sa kahiubos
nga hagbay rang nalaya
sunugon ko kini aron ang aso maoy mosigilon sa ginoo
didto sa kalangitan ug himaya
panahon na ang pagkuyog ko sa kalipay bisag
kini sila lumalabay lamang
usbon ko na ang tanan
mosanib ako sa mga
bulak sa ilang pagpamusyak
mokuyog ako sa mga
kahoy sa pagitib sa ilang mga sanga sa ilang pagpanahon
moadto ako sa luyo sa mga dag-om niining
mga panganod sa atop sa akong
mga huna-huna
molipot ako sa ilang likod
kay atua didto ang tumang kahayag sa adlaw
nga dili lang alang kanako
tungod kay para kanato kining tanan
mukuyog ba ikaw kanako?
No comments:
Post a Comment