ang akong duha ka alugnan nga mat-an

Kining akong duha ka alugnan
Puros mat-an
Magsigig panilip sa mga bitoon
Kada lunes ug miyerkoles
Siging handom ug langit
Kay kuno wa pa sila kaadto.

Ako ra man god usa sa akong katre
Anang martes ug miyerkoles
Kay wala ka man
Ug dayon ug pamukaw niining
Akong duha ka alugnan nga
Mat-an siging hangyo
Nga paabrihan ang bintana
Aron manilip na usab
Sa mga bitoon

Dugay ka na man gud diha
Ug unsa pud kahay imong gidugayan
Dili ka gayod motug-an

Miyerkoles karon ug ania ako
Dili makatulog aning duha ko ka
Mga alugnan nga mat-an
Ang usa akong gigakos sa akong dughan
Ug ang usa akong gitandaytandayan

Apan bisan pa ug giunsa ko kining
Mga alugnana
Magsigi lang gihapon sila ug handom
Sa mga bitoon

Sa kadugayan nalooy ako sa akong
Duha ka alugnan nga mat-an
Giabrihan ko ang bintana
Ug dia kaming tanan
Nagdungan ug sud-ong sa daghan
Kaayong mga bitoon nga
Nangompayot sa itom nga buhok
Sa among kagabhion

Sa haw-ang kaayo nga langit.

Gamingaw kami. Ania naglingawlingaw.
Nagtagnaay asa ang big dipper, asa
Ang little dipper. Asa ang venus.
Samtang wala ka sa among kiliran.