SA IMONG PAGKAMAAYONG MOLUTO

Saludo ako sa imong pagkamaayo moluto
Sa akong mga paboritong putahe
Sakto sa timpla sa asin, dunay gamayng tam-is sa asukar
Ug gamayng aslom nga moigot-igot sa akong dila
Duna puy gamayng kapait pero lami lang gihapon
Sa akong panglasa. Saludo gayod ako kanimo sa
Imong pagluto. Humot. May pagkahalanghalang.
Maayo gayong pagkasagol ang mga sibuyas
Ug ang kamatis ug ang ajos ug sili ug luy-a
Nga gigisa sa mantika sa oliva ug
Sa aslom nga suka gikan sa bahal nga tuba.

Saludo gayod ako. Nabati ko ang imong gugma
Sa sulod sa dughan sa piniritong manok.sobra nga gugma.
Morag gabukal nga sabaw sa tinolang manok nga bisaya
Nga gitanglaran. Saktong pagkalata sa kalayo nga gikan
Sa bukong ug takong ug lahing.Way sabod
Birahon ang unod sa pako ug sa paa. Kadako gayod
Sa imong gugma kanako. Gibati ko kini sa imong
Lami nga nilutuan
sud sa akong tilaok, lapos sa
Baba sa akong atay ug ngabil sa akong kasingkasing.
Mihagok ang
Akong tiyan sa tumang kabusog nga langitnon.

Apan karong gabhiona, aduna kay giluto nga mas lami
Pa gayod kay sa piniritong manok ug tinola. Humok nga
Karning baka. Imo kuno kining gibunalbunalan disir
Gihumol sa suka ug gamay nga asin ug paminta.
Ginapahumok sa
Daghang latos sa habol nga sundang sa tadtaran nga tugas.
Ayha nimo
Gilat-an ug gitimplahan. Akong gitilawan. Mas lami gayod.
Mas nanam. Mas sabroso.
Surop ang kalami sa tanang salog sa akong dila.
Lapos sa akong tilaok, sa kasing kasing sa atay sa tiyan sa tanang
Liko-liko sa akong tinai. Nagdumili pa gani ang akong lubot
Sa pagpagawas niini.

Gipangutana ko ikaw. Akong giunhan nga dili na gugma.
Kay natilawan ko na ang lami niini. Mas lami pa kini sa gugma.
Ingon ka. Ang kalooy imong gilamog didto. Ang compassion.
Ang pagsabot sa mga kasaypanan. Ang pag-unong.

Ingon ka mas lami kini sa gugma. Kay ug kon wala na ang gugma
Usa lamang ang imong pangayoon kanako. Bugti sa imong
Pagkamaayo moluto. Pangayoon mo ang kalooy.
Ug dugang kang gipangutana niya?
Andam ka ba mohatag sa imong kalooy bisan ug wala
Na ang gugma? Andam ka bang mounong bisan ug wala na
Ang kalami sa mga niluto?

Nabukog ka sa karneng baka bisag haskang lataa.
“Lami pa ba?” nangutana siya. Palihug tubaga. Palihug lang.