ang karaang balay ni nanay ug tatay

1947

pagkahuman milayas ang mga hapon

nagsugod ug tigom si tatay ug mga kahoy

lig-on nga mga tugas gikan sa halayong bukid

gihakot paingon sa among lungsod

si nanay usab naningkamot sa pagtigom

sa ginagmayng halin sa tuba ug sa mga sasing

sud sa iyang alkansiya aron makakwarta

kay aron silang duha makatukod ug dako

ug lig-on nga balay sa among lungsod

natuman ang ilang pangandoy. tugas ang

mga haligi ug ang mga kilid kilid niini

dili madutlan sa mga anay ang balay

nilang nanay ug tatay

nanganak silag lima sa ilang gugma

tulo ka babaye ug duha ka lalaki

midagan ang panahon. kusog nga pagdagan.

nangahagba ang tanan. dili magkasinabot ang lima.

gaiyahay ug paturatoy. ang uban sigig panomboy.

kay mao kini kay mao kana. maglain na kita.

iyahay na. walay angayng magsalig. angayon ang

tanan. bahinon bisag unsa kagamay. apil na ang

lig-on nga balay ni nanay ug tatay.

2008

For sale, house and lot, 305 square meters.

City lot. Direct buyer only. Contact Cel # 0986134567

wala nay tingganay ang lima ka mga magsoon.

mao kana ang gidangatan sa paningkamot nilang nanay ug tatay.

nadutlan ra gayod ang ilang tugas nga balay sa ilang mga anay.