SA DIHANG GIKASAL NA KITA

Sa wala pa kita kasla

Mitambag si nanay

Mitambag usab si lolo

Ug si tatay

Nganong ikaw man

Nga naa may daghan

Nga unta dili sama

Kanimo nga gidungog

Nga dato? Nganong ikaw

Man nga nagpuyo ka

Man sa dako nga balay

Sa habog nga buntod

Doul sa mga panganod?

Misulay si nanay sa

Pagbabag pinaagi lang

Sa yano nga tambag

Apan wala gayod ako

Mipatoo. Gahi gayod

Ang akong ulo sama

Sa usa ka bato sama

Sa usa ka semento

Sa poste sa sementeryo

Karon ania ako

Sa lubong ni nanay

Ni tatay ni lolo

Nangayo kanila ug

Pasaylo. Ngano ba

Gayod nga ikaw pa man?

Langit ikaw yuta ako

Tubig ako lana ka

Bato ang imong kasingkasing

Ug ang ako lapok lang

Nganong ikaw pa man

Nga aduna man untay daghan

Nga tinood nga nahigugma

Kanako. Apan bisan pa

Niini ikaw lang gihapon

Ikaw lang gayod gihapon

Bisan pag imo akong

Gibudhian bisan ug ako

Dugay na nimong gibiyaan

Bisan pa sa akong kapakyasan

Ikaw lang gihapon

Ang akong handumon.