Saturday, September 27, 2008

ako ug ang akong mga igsoon




Akong mga igsoon. Mga pobre.
Ako silang angkonon, sa kapareho
Sa among mga dagway. Sila naghandom
Nangita sa ilang mga bitoon. Nagdamgo
Ug tambal sa ilang pag-antus.
Lubog pa sa subang gibahaan
Ang ilang panglantaw.
Akong mga igsoon. Mga pobre.
Akong gitambagan nga ihangad
Ang ilang mga niwang nga nawong
Sa langit. Atua didto ang daghang
Mga bitoon. Ako silang giingnan
Nga dili magdoko ug magtan-aw
Sa lapok. Naa ang ulod nga siging
Panghadlok sa ilang pirma.
Akong mga igsoon. Walay mga bitoon.
Blanko ang ilang mga palad.
Walay mga linya. Walay mapa
Kon asa nila pangitaon ang
Bulawan nga kolon sa tiilan
Sa bangaw.
Akong mga igsoon. Pobre sila.
Kalooy sa ilang mga niwang
Nga mga nawong. Akong gihangad
Ang akong nawong. Nangita sab
Ako sa akong bitoon. Sama nila.

No comments: