ANG GINAGMAYNG GINANSYA NI NANAY SA TINUHOG NGA SAGING
Si nanay maestra
Apan tungod kay daghan man kami
Nga iyang mga anak
Samtang si tatay
Naghubog-hubog sa tindahan
Ni manang soling
Diin nagbaha ang daghang tuba
Ug daghan silang iyang
Mga barkada
Nga gapabula sa ilang mga baba
Sa gabii magsulat si nanay
Sa iyang lesson plan
Sa silaw sa lampara
Samtang kaming iyang mga anak
Tupad kaniya nga nagtoon sa
Among mga leksyon
Nagbasa sa among mga libro
Pagkahuman sugod na ang pagpanit
Sa saging pritohon
Butangan ug latik pagkaugma
Sa kaadlawon aron ibaligya
Sa canteen sa eskwelahan
Dili lang kay kana ra
Maghimo pa ug puto
Tira-tira
Budbud nga kamoteng kahoy
Ice candy
Ug bukayo linginlinginon
Sa among mga palad
Sayo sa kaadlawon mata na
Magrosaryo kadali
Paspas ang pangadye
Kilat ang pagpanguros
Kay daghan pang mga baligya
Ang ibutang ipahaluna sa basket
Tinuhog nga saging sab-a
Budbud, bukayo, ice candy
Puto ug kamoteng kahoy
Ingon ana ka kugihan
Mangita ug kwarta si nanay
Samtang siya nagmaestra
Samtang si tatay naghubog-hubog
Sa tindahan ni manang soling diin
Nagbaha ang tuba
ug nagpapilit sa iyang mga laway
Didto sa iyang lantay
Balikbalik kana kadaadlaw
Kada gabii kada kaadlawon
Ug milabay ang mga adlaw
Mga tuig, kadali ra gyod
Kapaspas ug dagan sa
Among panahon
Unang namatay si tatay
Kanser sa atay
Misunod si nanay
Diabetic tungod
Sa pagpunay ug subad sa tiratira
Samtang naglikit sa budbud
Samtang nagsul-ob sa plastic wrapper
Sa iyang ice candy
Samtang nagputol putol sa hinalob
Nga dahon sa saging putos sa
Mga puto ug kamoteng kahoy
Wala nadato si nanay apan
Milampos kaming tanan
Ug kami ang ginansya ni nanay
Sa iyang tinuhog nga mga saging
Sa iyang giinat-inat nga tira-tira
Sa iyang gipustan sa puto ug
Kamoteng kahoy
Kami ang mga ginagmayng ginansya ni nanay
Apan wala gayod siya katilaw niini bisan gamay
No comments:
Post a Comment