MOABOT RA ANG BUNTAG

Sus, ayaw na palabi ug kagool diha
Hapit na mahuman ang kagabhion
Katulog lang sa. Bisag gamay na lang.
Pagtagpilaw lang usa.
Kay hapit na mahuman ang gabii.

Moabot ra ang buntag.
Walay gabii nga moluntad.
Moulan. Mobaha. Apan mahuman ra
Gihapon ang tanan.
Moabot ang buntag.Ang paghubas
Sa baha. Ang kalinaw sa sapa.

Ayaw pagpalabi sa imong kagool diha.
Pahiri ang imong mga luha.
Pahulay sa. Ibutang kadyot ang imong krus.
Lingkod kadyot sa bangko.
Tapad kanako. Mag-estorya usa ta.
Kanang kataw-anan.

Ayaw ug reklamo
Nganong dugay ba kaayo ang buntag?
Kalangayan ba sa adlaw?
Pahulay sa. Mag-estorya ta.
Kaadlawon na.
Oy! tan-awa ang bulan!
Nagpahipi pa sa gamay nga panganod
Nga itom.
Nagpahiyom kanato.
Morag dunay ihunghung
Morag dunay isaad.
Mamati usa kita. Bisag kadyot lang.
Bisag kadyot lang gud.
Oy! Dunay hangin nga milabay.