sa dihang miabot ang akong kaulag
nahadlok ako
kay dili pa ako preparado
gilubag ko kini
gihipos gitagotagoan
gipanghimakak
giantusan ug puga
sa daplin sa kasagbotan
sa akong pag-inusara
sa daghang mga kabalaka
nagpakaaron-ingnon ako
sa bulan ug sa mga bitoon
apan sud sa akong ginhawaan
ug sa lawak sa akong kasingkasing
daghan akong mga luha
nga gitagoan
asgad ang baho sa mga
kilid sa akong pagbati
natay-an ang akong
kaulag ug nagabok
ang akong mga laraw
sa akong kinabuhi
nawala ka napul-an sa
kadugay sa imong pagpaabot kanako
nawala usab ako
wala na kita magkita sud
sa dugay nga panahon
giwagtang ko ang gugma
sama sa pagwagtang
sa akong mga kaulag
diha kanimo
nangahulog ang mga dahon
milabay ang daghang panid sa mga hangin
ang mga amihan ug habagat
karon andam na unta ako sa tanan
apan wala na ang kaulag
patay na ang gugma sa dihang
miabot ka. nangunot na ang
atong mga agtang ug ang atong
mga kamot nagkurog na
sa tumang kahiubos ug
kapungot. giwaldas ko ang
akong panahon sa akong
mga paningkamot
ulahi na ang tanan. daghan ang
akong mga pagbasol ug sama
sa kaulag kaniadto
ako kining
gitagoan ipon sa mga taya
ipon sa mga asgad ug mga aslom
ipon sa mga pait ug mga hait
nga nagkagot nga mga ngipon.
No comments:
Post a Comment