makinasyon

makinasyon sa akong imahinasyon

usa ka figment sa mga tyurka

ug mga putol putol nga metalika

itapak sa akong mga

panumduman nga nangabitas

sa imong pamalikas

ang imong gusto sayod ako

nga ikaw dili gayod masabtan

bisag unsaon

tuison mo ang tanan kay dili nimo gusto

ang kalinaw nga panlantaw sama sa usa

ka dagan sa tubig sa daplin

sa usa ka dike

metal nga kabaw nga ang ikog puthaw

galvanized iron nga pato

ug ang ilang tingog inagay-ay sa mga

bolitas ug turnilyo

hampak sa martilyo ug maso sa

pagbuak sa mga bato sa akong kahilom

haw-ang ang tiyan sa screen nga

bintana

mo-aw-aw ang imong iro sa usa ka bulan

nga tinga sa kilid sa usa ka kahoy

nga ang dahon alambre ug ang mga

sanga kabilla

unsaon ko ba pagsabot unsaon ko ba

pag-ipon kanimo sa imong mga

hiwi ug lubag-lubag nga pangwenta.

sa imong makinasyon, namatay ang akong imahinasyon.

apan sama sa tanan, aduna ra kini kinutuban.

ania pa kanako ang mga linugdangan.

ang mga taya, ang mga tiniltilan nagpaabot lang gihapon.