Mga panganti sa usa ka isog nga tawo sa mingaw nga lungsod

I

Bantay ka lang animala ka!

Lugiton ko kanang imong mga mata!

Ii

Dili na kita moadto sa korte suprema

Palutawon ta kana siya sa suba ugma

Iii

Yawaa ka! Letse kang yawaa ka!

Dali diri kay sagpaon taka!

Iv

Peste! Peste! Dangan ka sa katilingban

Patyon ta ka! Pusilon ta kang jawaa ka!

Mao ka na ang mga panganti sa usa ka isog nga tawo

Didto sa usa ka halayo ug mingaw nga lungsod.

Pangadye-on ta karon tulo ka amahan namo, tulo ka

Maghimaya ka maria, tulo ka Gloria patri. Atong ihangad

Ang atong mga nawong sa langit. Mangiyak kita.

Gipusil siya gahapon. Ug wala mailhi ang yawa

Nga nagpatay kania. Walay klaro ang nawong sa

Peste nga accessory. Walay nakakita sa mga animal

Nga accomplices.

Nagmaskara ang mga dangan.

Nagdalidali sila paglugit sa mata sa isog nga tawo

Paspas silang midagan.

Ug ang iyang lawas ilang gipalutaw sa suba.

Ug didto namugna

Ang laing baho nga lawas sa hustisya.

Miburot kini.

Naglutawlutaw sa suba

gianod paingon sa dagat ug gikulinitan

Sa mga isda ug daghan kaayo nga mga nukos

Nga miputos daw sagbot sa iyang lawas.

Puros mga gutom.Puros mga laog.