ang sunoy ni Ang Kiukok

kon mahinagbuan sa usa ka sabungero

ang sunoy ni Ang Kiukok

dili kini kahibalo kon sunoy ba ang iyang gikaatbang

makaingon siya nga dili kana sunoy nga iyang igtalare

sa bulangan kada Domingo.

dagko ang mga tiil ug mga kuko. ang ulo morag dili ulo gani

sa usa ka manok. ang mga pako morag mga sundang.

ang mga kuko morag mga hait nga kutsilyo.

ang mga balahido morag mga lansang sa dagkong haligi

sa balay nga lubi.

ang iyang mata morag butones nga pula sa usa ka luag nga karsones.

ang iyang tahod morag bangkil sa buaya.

gitutukan sa usa ka sabungero ang sunoy ni Ang Kiukok

ang iyang nakita dili tari, kon dili kukok.

ug ako nga nagtan-aw sa sabungero nga nagtan-aw sa sunoy ni ang kiukok

nagpanglingo. lahi diay ang kamatooran sa usa ka pintor sa pantan-aw sa sunoy.

lahi usab ang tinood nga sunoy. lahi usab ang mga mata sa sabungero.

lahi usab ako.

busa nganong but-an ko man ang sabungero nga gustong mamulang kada Domingo

ako usab. kay ngano gusto ba usab ako nga ila akong but-an kon dili usab ako ganahan

motan-aw ug mupusta anang bulang kada Domingo?

lain-laing mata. lain-laing panglantaw. lain-laing realidad. wa tay but-anay pre.

diri ko. diha ka. ang importante nag-enjoy ta.

ug ang sunoy ni Ang Kiukok pasagdan ta. Ang sunod, mao ang Himongaan sa mga mata

ni Ang Kiukok. Basin naa na. Puhon.