ania ako nagmugna
nagtampisaw sa mga lubog nga sapa sa akong nataran
nagtimbaya sa akong mga bulingon nga mga karsones og sinina
sa tungatunga sa bungtod sa kabaho nga akong giamuma
(kabalo ka ba nga ganahan
kita sa atong kaugalingong baho?
sama sa pagsimhot sa atong nauga nga mga singot
sama sa pagkoot sa atong lubot og pagsimhot
ayaw pamakak gihimo mo kana dili lang makausa
naandan mo na kana,
sayod ako kay ginabuhat ko kana
sama sa paglikit sa kugmo og pagpaligidligid niini
sa imong palad, sama sa imong pagpanghingiki humn og kaon
og dayon
simhot na usab sa imong mga kiki nga napan-os
sa sayong kabuntagon sa wala ka pa makaligo,
sama sa pagkuot sa imong ilong
og pagsimhot sa imong gisingsingan nga tudlo)
unsa ba gayod ang tinood nga kahulugan niini?
sultihan ko na ikaw
pagsadya, paglipay, sayaw sa imong kaugalingong tugtog
pag-awit sa imong kaugalingong mga kanta
kay kinsa ba god ang tawo nga
wala na mahigugma sa iyang kaugalingon?
gihigugma ko ikaw, pasaligi siya,
pasaligi ang imong kaugalingon karong adlawa.
ayaw kaulaw, imo kanang kaugalingon, og
nindot ka nang pagabatia. buhata kana batia kana sa
matag adlaw nga ikaw gusto na nga magpakamatay
kay lagi dili na nimo madawat ang mga
nagtipun-og og makabungog nga mga kasakit
sa imong kapakyasan
sa mga gugma nga gipang-ulod na sa kalimot
sa mga kagahapon nga wala nangakuspaw na
sa imong mga kalagot
saimong mga ngipon nga walay undang sa pagkagot
pasaligi ang imong kaugalingon, ingna nga siya pa gihapon ang
imong tinood nga gihigugma
kay og dili mo kana mabuhat sa matag karon og unya
og kon ikaw gihapon magpuyong gatakuban,
unsaon ba usab nimo paghigugma og paglipay ang uban?
ayaw na paabota pa nga momala ang mga sapa sa paglaom
buhata na karon dayong, pasaligi ang imong kaugalingon, hala salom!
No comments:
Post a Comment