sa yanong pagkasulti

sa yanong pagkasulti
mahibaw-an nimo kon asa gapadulong ang hangin
pinaagi sa gipadulngan sa mga dahon sa mga kahoy

sama sa atong relasyon karon
mahibaw-an nako kon asa padulong ang imong kasing-kasing
pinaagi sa gipadulngan sa imong mga pagbati nga nagpunay og palayo kanako

bisan pa og wala na ang hangin ang imong mga buhok midunghay alang sa imong
dakong gugma paingon kaniya

nga sa dihang ako kang didool og gisulayan nako paghawid ang imong mga kamot
nanindog ang imong mga balahibo sa kalood og ambot ba nga ako usab
gibati man og kahadlok

sa yanong pagkasulti mokuyog kita sa tayhop sa hangin
padulong ako sa bukid og ikaw padulong sa dagat

hangtod nga ikaw mapul-an sa mga isda og ako usab mapul-an sa mga kamoteng kahoy
paabotan na lang nato kon moabot kanang higayona

seguro ang hangin lang gihapon ang makasulti sa pag-abot sa kon unsay bag-ong tinood.
unsa kaha kon dalhan mo ako og isda og dalhan ko usab ikaw og kamote og kitang duha

mobalik sa patag aron magsalo og balik sa atong mga kakulangon?
paaboton ko gayod ang pag-abot nianang maong higayon.