maoy akong hilig ang pagbuhi sa mga goldfish
busa naghimo ako og gamay nga lam-aw kanang morag natural langsa silong sa among balay dapit sa among hagdan
sa kilid sa among nataran sa silong sa punoan sa dako kaayo nga starapple
diin dili kaayo landong og aduna usay ginagmay nga kahayag gikan sa adlaw nga makaon sa mga lumot didto
akatado ko kaayo ang mga goldfish
sakto sa lawog dili pod kaayo daghanon
kay mangabusdik ang ilang mga tiyan
dayon unya og pangamatay og miabot ang
panahon nga
nangitlog,
nangapusa ang mga itlog og nanaghan ang mga goldfish
nga ang mga anak akong gilain kay lahi diay kini sila
ambot og nasayod ka ba niini
kay ang ilang mga ginikanan nga bisan og sakto sa busog motukob lang diay gihapon sa iyang kaugalingon nga mga anak
wala ako mobalak kanimo dili nako tuyo ang mga sumbingay tinood kining panghitabo sa ilang kinabuhi diha sa lam-aw
tinood usab kini sa atong kinabuhi diha sa atong balangay nga aduna bayay mga ginikanan nga motukob sa ilang kaugalingong mga anak
og kining tanan gilubong lamang sa kalimot
kay juno makaulaw kay kuno makasakit lamang
kaykuno makahatag lang og kasamok sa atong
tagsa tagsa ka pamuyo nga malinawon.
usa ka adlaw niana nawala ang goldfish sa akong lam-aw
wala ako nasayod kon kinsa ang nanguha
og kon sila nangamatay na ba
og dis-a sila gilabay
sa atabay ba
sa basakan ba
o didto ba kaha sa dagat
aron seguro silang tanan mangamatay sa tumang kaasgad
og sa kadagko sa mga balod nga sarang makalumos kanila
nagpabilin na lang ang mga lumot nga haskang bagaa
nga morag daghan kaayong mga kamot nga mitook sa tanang mga gagmayng bato didto
mibaga ang mga sagbot nga morag habol nga mitabon sa mga mata sa usa ka tawo nga bag-opa lang gideklarar nga patay na
ang akong lam-aw ako nang gibiyaan
gusto na man god nakong hikalimtan.
No comments:
Post a Comment