unsa bay sayop?

kon moingon ko nimo
nga nakakita ko og mga bitoon sa tunga sa kaudtohon
unsa bay akong sayop?

anaa ba sa akong pagsulti
o anaa ba diha sa kamatooran nga ako gayod nakakita
og mga bitoon sa akong kaodtohon?

ikaw wala ka ba makasulay og lantaw sa mga bitoon
sa tunga sa kaodtohon?

hinumdumi kuno kadtong gisagpa ka sa daotang hangin
sa dihang ang adlaw nasang-at sa tumoy sa taas kaayo nga kahoy?

hinumdumi kuno kadtong gilaparo ka sa imong tatay
kay nganong wala nimo mapatuna ang kamatyonon niyang kabaw?

o di ba? dili ba daghang mga bitoon sa tunga sa kaudtohon?
ibutang ta lang nga ako daghan usab og mga kalapasan kaniadto
dawaton nako kana sa walay pagsupak
apan morag sobra ra baya usab ang ilang paghampak

pagkadaghan baya kon atong tagsatagsaon pag-ihap sa mga bitoon
nga nanagkumbitay sa mga panganod diha sa tungatunga sa kaudtohon

dili sila nindot tan-awon dili ba? sakit sa dughan ang ilang mga kidlap

apan yuna pa dili ba mas nindot ang mga bitoon kon sila atong lantawon sa tungatunga sa atong kagabhion?

mas nindot gayod labi na kon atong dimdimon ang ilang mga dan-ag
sa usa ka lalom kaayo nga pagpakahilom
og hunahunaon ang lain na usab nga paghinam-hinam sa usa ka umaabot