pagkadaghan sa putahe

pagkadaghan sa mga putahe nga imong giluto
karong adlawa
naay lumpiang shanghai nga crispy kaayo
humba nga tiil sa baboy, spaghetti nga wala
nimo putla aron kunohay tag-as kaayo
nga akong suyupon pagkaon
beef steak, morkon, bangus nga sinugba nga giputos sa dahon
sa saging, paella, lasagna,

galibog ko kon unsay akong unahon pagka-on
nakapangutana ko kon unsay
milagro nga nahitabo diha sa
kusina

"wedding anniversary nato dear!'
mipahinumdum ka

sud sa akong dughan wala na kaayo
ang daghang pagbati sama sa una
nga bag-o pa kitang kasal

morag usa ka love letter nga
nagkaanam og kapapas ang mga
agi sa lapis

wala man mapapa pero morag
nagkahanap naman
sa tinood lang

"oi, sorry nakalimot man noon
ko da" mitubag ko dayon og
kiss sa imong lips

dili na init ang kan-on
wala na ang humot nga aso
nga kaniadto moabot pa gani
sa mga aping sa atong kisame
naglikay na usab ako pagkaon
anang humba og nawala na ang
akong gana anang paella.

mikuha ko sa spaghetti nga
haskang tag-asa lisod kaayong
kan-on
akong gilukot sa akong tinidor
og akong giputol sa dihang
mibaga na kaayo

"dapat imo sab unta ni nga
giputolputol, lisod man
kan-on" mikomentaryo ko
gamay

"sus, ayaw na diha og mulo
gikapoy baya ko" mitubag ka

sakto ka, misagbat ang akong
konsyensa, dili lang baya ikaw
ang gikapoy,

kitang duha baya, apan
wala na ko mosulti nimo niana

" lami pa gyod gihapon ang
imong spaghetti" maoy
akong ulog-ulog nimo

"sus ako pa!" nanghambog ka.

trese ka tuig na ang milabay
walay samok sa gawas sa atong balay
pero ambot kon sa sulod kaha
sa mga lawak sa atong hunahuna
morag daghan namang nagnana
morag naa na may nasamdan
nga wala nanambal

morag naa na may tanga
nga nagnganga og mga
ulahipan nga nanago
sa mga kilid sa imong
tokador og aparador

lain na usab nga tuig nga
atong tagboon og hap-an
walay supak kon unsay dangatan

ang mga dahon walay bagotbot
kon kini mangahulog sa mga sanga
og kon maglutawlutaw sa hangin
nindot gihapon silang lantawon

sa dihang nahulog sila sa sapa
og naglutawtaw sa tin-aw nga tubig
paingon sa dagat ang ilang dala
mao lang gayod ang kahilom

walay samok ang kalibotan
kon dili ka mangutana ngano
nga naa ang pagbangotan

gaksa ang unsay naa diha sa imong mga bukton
ayaw na pangita anang mga wala diha

unsay bay pulos anang pagsumbong mo sa hangin?
nga igo man lang kanang mamati og dayon molabay

mas maayo pa nga maghimo kitang duha og daghan kaayong mga perlas
gikan sa atong mga laway og mga mga luha gikan sa atong mga rehas.