anang pagbangotan

sa dihang misulti ko nimo nga duna koy
wala magustuhi nga unta imong usbon
mikusmod imong nawong og miingon ka
nga nagkita ta nga dagko na og wala
ka nay mahimo og mitudlo ka sa dagko
kaayo nga mga kahoy isip sambingay
nga ang mga balikog nga mga sanga niini lisod na
gayod nimong tul-iron og imong gisumbalik
ang akong mga pangutana sa laing mga
pangutana, " suma ikaw, sulayi kuno
og tul-id ang mga dalan nga balikog
ngagikan pa kaniadto balikog nang daan
sa wala pa kita matawo

kaya nimo?"

nahilom ako.
sakto ka.
og gikan niadto kon unsang
sayop man ang akong makita
motan-aw na lang ako sa mga balikog nga
mga sanga sa kahoy og mga dalan
maghinuktok
sa kilid sa mga bintana

nanaghan ang mga sayop og midagsa ang mga
dili na gayod mausob kay sama sa imong giingon
nagkita ta nga mga dagko na og mga bukton
og duna nay tagsatagsa ka mga hunahuna

mora ko og buang nga nangayo og kausaban
sa mga bato og nahimo akong kataw-anan
sa mga tuway nga nagtago sa ilalom sa mga
lapok sa kilid sa mga kanipaan

naglingkod ako sa ilalom sa punoan sa mangga
og nakita nako ang mga kalanggaman nga mibatog
og dayon og pangpanglupad sa dihang mitutok ako nila
morag aduna akoy nakat-onan sa gahom sa ilang mga pako
og gisulayan ko ang pagpalupad sa akong mga hunahuna

didto sa taas daghan kaayong tubag ang mga panganod
og ang mga hangin nga gawasnon naglupadlupad naglutawlutaw
walay naghawid kanila walay nagmando kanila kon asa sila padulong
wala sila mag-away kon kinsay sakto kanila
og wala na silay gigamit nga kasingkasing

ang gahom sa mga pak-an nga langgam anaa sa ilang pagpanaw
sama sa mga panganod sama sa mga hangin nga gawasnon

wala na ako mangutana pa sa mga bato
og ikaw salig sa imong kaugalingon nanugid sa imong pagkamalipayon
hangtod nga usa ka adlaw niana kalit lang ako nga nawala
nakuratan ka og nangutana ka sa usa ka lawak
nga wala nay tawo

wala kay madungog nga reklamo
wala na usab didto ang mga tubag