samtang naghimo ko og mga balak sultihan taka

samtang naghimo ko sa akong mga balak
karong adlawa, og sa tinood lang nagsugod
ako paghimo sa akong unang balak
kaganiha pa sa alas tres sa kaadlawon
alas nyube na baya karon

sultihan taka sa tinood nga ako nagsige
og lantaw sa mga gahubo nga mga hulagway
sa akong mga gihigugma og gustong higugmaon
gitutukan ko ang ilang mga ngabil, ang
ilang mga paa, ang ilang mga dughan
ang ilang mga buhok ang ilang mga panit
ako pa ganing gihikap ang ilang mga aping

og ang akong kasingkasing
nangabre sa usa ka sulog nga pagbati nga
hinay hinay na nakong nasabtan

milukso,misayaw, milupad nga dili man unta
kini langgam, mibayaw nga unta dili man
kini usa ka diyos,

wala ang akong kakapoy og pagkadaghan gayod
sa mga balak nga nanggawas sa akong baba
wala koy tingogtingog sige lang kong gasulat

nindot tan-awon ang mga naghubo mora silang
mga kamatooran sa akong kinabuhi nindot kaayo
ang ilang mga lawas, dagway, buhok, paa, kamot,
pati na gani ang ilang mga kumagko og mga balahibo,
ang ilang mga kuko og ilang mga pino kaayong ugat
sa ilang mga hamis kaayo nga mga bukton

makalipay gayod kaayo, mabati ko ang pagdagandagan
sa akong mga dugo sulod sa akong kalawasan morag
mga kindergarten nga mga bata nga gipagawas sa ilang
klase aron mag-recess og magdula og swing didto
sa ilang playground silong sa adlaw sa
bugnaw nga mga huyohoy sa hangin.