kabahin sa pagputol sa punoan sa ylang-ylang nga giatake sa daghang mga ulod

karon ang mga ulod miatake sa punoan sa akong ylang-ylang
nga gitanom ko sa miaging upat na ka tuig nga milabay
sa bag-o pa akong naminyo niadtong panahona
gani nakapamulak na man kini og ikaw midayeg sa hangin
og nangutana dis-a gikan ang maong kahumot

og garbo ko ang pag-ingon nga ang nanghumot
mao ang akong tinanom nga ylang-ylang tapad sa pader
nga nagbulag sa atong balay

apan miabot ang panahon karon nga giatake sa daghan kaayong
mga til-as ang maong ylang-ylang og ikaw nabagolbol
nga ang mga til-as misulod na sa imong balay
og haskang katola ang ilang mga balahibo
nga dili na kuno nimo maantos og busa
ikaw naghisgot nga kinahanglang putlon
na ang maong kahoy sa ylang-ylang nga wala na
gani mga dahon kay gihurot na og
kaon sa maong mga ulod

mihangyo ko nga palabya lang ang panahon
kay kanang mga ulod nga nagkamang karon
nga ingon kang haskang katola sa
ilang balahibo nga nanulod sa
imong talad-kan-anan

nga kana sila mamahimo ra man puhon
nga mga alibangbang og motabang
na usab sa pagbuhi og paglabong sa akong ylang-ylang

apan wala ka mosugot sa akong hangyo og ako nga
nag-amping sa atong panagsilingan
misugot bisan baya og sakit pa sa akong buot
sud sa akong dughan

miabot ang mga upat ka mamutolay sa kahoy
nga nagdala og pisi, gabas, og sundang
og miingon nga ang bayad sa pagputol
sa kahoy sa ylang-ylang nga puno pa sa mga til-as
kay lisod lagi balig dos sientos jud ka pesos,

mikuot ko og kwarta sa akong pitaka
mihatag sa tres sientos
gipakapinan nako og usa ka gatos
mihangyo nga paspasan ang pagputol samtang
wala ako dinhi sa akong balay
og dayon dalhon ang tanang kahoy nga pinutlan
sa ilang balay aron ilang gamiton
og sugnod o sa bisan unsa na lang
nilang kagamitan

dili ko gustong dunay ibilin bisag
usa na lang ka dahon sa ylang-ylang
dinhi dapit sa akong nataran

kini tungod kay kita silingan dinhi sa atong baryo
bisan og gani, kon buot kwentahon, dili pa kita suod kaayo