didto sa imong isla

didto sa imong isla
pagkadaghan sa nindot kaayong lantawon
og sa palibot sa iyang kalingin
sama sa usa ka gamay nga
kalibotan nga imong
gipoy-an karon
pagkadaghan gayod
kaayo sa mga nindot
kaayo nga mga isda
nga gawasnon kaayong
naglangoylangoy
sa ilang kaugalingon
nga mga kapay

didto sa imong isla
ikaw lang ang nag-inusara
apan pagkamalinawon mo
pagkamalipayon mo
bisag wala na gani siya
nga imong gitawag nga
kapikas

didto sa imong mga isla
nagpakatinood ka
naghubo ka
misalom sa imong
kaugalingon nga dagat
wala na didto ang
mga wakwak ang
mga bitin og
mga halas nga sa
una naglupadlupad
naglikos
nagpaak sa imong
mga pangandoy

didto sa imong isla
bisan ikaw lang usa
pagkamalipayon mo
tungod kay didto
ikaw lang gayod
ang tinoon nga tinood