sa pagtanom og mga similya sa humay

gamay lang ang suhol sa usa ka adlaw
taas og habog og init ang kaudtohon
nagpunay kita og duko-duko og tusok
sa mga similya sa humay
nianing lapokon nga yuta dinhi
sulod sa ilang mga kahon nga basakan

gitawag na kita sa usa ka
paniudto nga gihatod sa ilang
sulugoon nga babaye
mikawaykaway ang kamot
aron kita muhunong una
sa atong gibuhat

pagkahuman niya og butang
sa iyang basket dinha sa
silong sa punoan sa
labong kaayo nga
karaang mangga

miduol kita kaniya og
gitangtang nato ang atong
mga kalo og taas nga bukton
nga sapot
nagpahangin namaypay sa
atong palad

nanghugas kita sa atong mga
kamot sa tubig sa kilid
sa kanal nga agianan
sa tubig nga maoy
nagpabuhi sa mga
kinahon nga basakan
dinhing dapita

gisukad ang bugnaw na
nga kan-on og
gihapnig ang mga
tinap-an nga pirit
og pinirito nga
bantaan
og ginamos nga lupoy

adunay usa ka galon nga
tuba og pipila ka mga
sigarilyo nga Champion sa kilid sa
patag diin gihay-ad ang tanan

nagkinamot kita nga nangaon
og naghisgot kita kabahin sa numero
sa swertres nga midaog kagahapon
483 sipyat ang akong usa ka numero
wala man god ko mopatoo sa
akong damgo

364 kuno ang kusog karon
maoy iyang giingon nga pustahan
kon moabot
na si Dokdok nga maoy
tiglista og tigtali sa pusta

naghisgot kita sa
laing mosuhol kanato
karong sabado didto
dapit sa Bandera
sa likod nianang dako
nga bungtod
nga sa likod anaa na
usab ang dakong
basakan sa mga
zamoras

mas labaw kuno og
singko ang bayad
didto

daghan pa ang lain natong
gihisgotan ang kabahin
sa paggukod ni Linda kang
Tirso og hait nga sundang
kay nasakpan sa akto nga
nagjerjer ni Sonia didto
dapit sa kanipaan

nangatawa kita
kay nabilin ang purol
ni Tirso didto
nakadagan nga gahubo
didto paingon sa
taboan adtong miaging domingo

nagabaan kuno kay wala na
mosimba sa kapilya ni
Senyor San Vicente sa
miaging pista sa
Lubing Ugis

mitagay kita sa tuba
nga usa ka bol
gipasa pasa ang usa
ka baso
nga nabasa sa atong
mga ngabil

og dayog yupyop sa
Champion og buga
sa aotng pangagho
paingon lamog
sa bugnaw nga huyop
sa hangin gikan
sa kabukiran

ala una na
nahuman na
ang mga lingawlingaw og
pagpamati sa
mga ginagmay nga sugilanon
sa atong yano nga kinabuhi
isip mga sinuhulan sa
pagtanom og mga similya sa humay
sa kinahon nga basakan
ni Indong Nalzaro

ala una na
balik na usab
kita sa pagdukoduko og pagtisok-tisok
sa mga similya sa humay
niining lapokon nga yuta
dinhi sulod sa ilang kinahon nga mga basakan

init kaayo ang adlaw og layo
pa ang landong sa kahaponon
nga morag miingon og
misudya kanako:

lantawon ko ang imong
pag-antos

asa ka ba kutob?