niadto maong ang akong paboritong karsones
kadtong gituyo paggisi og kadtong
mas nindot kon dili na lang gayod
tapakan
uso man god, og ikaw sab mas ganahan
atong mga kulang sa panapton
kay aron ang imong pusod
manambo paingon
sa akong bukton
og kitang duha nagtapad tan-aw
sa pag-abot sa kangitngit
didto sa daplin sa baybayon
og imong gidap-ig ang imong hawak
nga walay tabon bisag nipis
na lang nga panapton
dapit sa akong bitiis diin
didto mibilangkad
ang gisi sa akong maong
nga karsones
pagkalami gyod sa akong gibati
sa dihang imong giinat ang
imong kahinam
aron matagbaw ang akong
kamingaw
pagkaanindot sa bulok sa kangitngit
pagkahumot sa mga buhok sa sayong kagabhion
pagkahumok sa iyang mga pangindahay
natingala baya ang mga walay alamag nga mga balas
nganong wala kita mangaligo
didto sa linaw kaayong nga dagat
samtang ang bulan nagpalingoglingog
nga morag walay nakitang dakong
bugno sa gugma og kaulag
No comments:
Post a Comment