ang piano ni carmelita

kay hubakon lagi kuno kini si carmelita
gipalitan og piano sa iyang papa
nga gipahimutang sa tunga sa ilang sala
aron malingaw ang pamilya
samtang si carmelita magsugod
na og tukar sa usa ka
clair de lune nga musika

mopiyong ang iyang papa og mama sa ilang mga
mata sa pagkaanindot sa mga nota nga
naglupad lupad sa mga sonata
nga gitukar ni baby carmelita

balik sa panahon sa kaniadto
wala kapugngi (kay kinsa ba gayod ang makapugong? ha? sultihi kuno ko?)
anang pangpanghulog sa mga dahon sa nataran sa usa ka karaan nga pamilya
nga kaniadto siging silhigan og haska gayong pagkalimpyoha

miabot ang panahon sa kalaay, ang di pagsinabtanay, ang paghari sa di panagsinahay og panagbingkil og panagdumtanay, igsoon batok igsoon,
amahan batok anak,
ang mga kagul-anan nga nagpatongpatong
ang mga nangamatay nga mga ginikanan nga sa walo ka mga anak bisan usa kanila
wala makatambong sa paghaya hangtod na sa paglubong hangtod na sa pagkahuman sa
mga nobena nga naandang ihalad alang sa mga patay

wala magkasinabot ang mga magsoon,normal lang diay kuno kana,
og si carmelita nakalimot na unsaon pagtokar
pagbalik sa mga sonata
labi na ang paborito unta nga clair de lune didto sa ilang sala

nabaligya ang piano, nabaligya ang balay sa insik nga ilang suki sa copra kaniadto
nga nagplite lang gani sa usa sa ilang mga lote didto sa syudad diin sila nangatawo

walay molungtad sa mga plano sa atong mga ginikanan
naghimo silag mga lawak alang sa tagsatagsa unta kanato aron maghandom kita kanila

apan sayang lang, kay walay usa sa walo ka mga anak ang gustong mobalik og mopuyo
walay matuman nga mga damgo sa mga nangamatay
walay mga tugon nga gipamati og gisunod og gibutang sulod sa kasingkasing

walay balay nga bisan og unsa kalig-on sama sa tugas og tanggili og sa mga haligi nga walay putol, nga dili moluhod sa yuta, mangaharag og dayon madugta
(kinsa ba ang tinood nga tag-iya anang mga haligi? ha? sultihi kuno ko?)
walay pulos ang piano ni carmelita, sayang ang tanan, kon nasayod pa lang ang iyang amahan
kon unsay dangatan, wala na lang unta kini nagtigom og kwarta og mipalit og mipiyong sa iyang mga mata
og mosulay pag-ila kon unsa gayod ang kamatooran sa musika sa kinabuhi.

basin nakalimtan lang niya nga lumalabay lang ang tanan sama sa usa
ka ngil-ad nga damgo sa usa ka kagabhion