sa kaanindot sa kalibotan

sa kaanindot sa kinaiyahan
niining atong kalibotan

sa mga salamin sa iyang mga tin-aw kaayo nga mga lanaw
sa kadagko sa iyang mga bukton diha sa iyang mga habog nga mga kabukiran
sa kainit sa iyang mga gakos diha sa iyang kalasangan

sa kahabog sa mga panglantaw diha sa kataas sa iyang mga pangpang sa pagkahalangdon sa iyang mga panganod
sakalalom sa mga lawod sa iyang kadagatan

mitindog ka sa iyang tunga sa iyang dughan og gipaminaw mo ang mga tingog sa iyang kasingkasing

gihigugma mo siya

apan sa iyang kahabog, kataas, kalalom, og kahalangdon,
bisag unsaon mo og buklad ang imong mga bukton
dili mo gayod kini hingpit nga magakos
og sa kamugbo sa imong mga tudlo, dili mo gani kini mahikap

bisan unsaon mog sabwag ang imong mga pulong sa iyang kawanangan
dili ka gayod niya mabati

ikaw, usa lamang ka grano sa balas sa iyang galawodlawod nga dagat
ikaw, usa lamang ka pat-ak nga kahayag sa kawanangan sa iyang bus-og nga dan-ag.

apan bisan pa niana, gisugid mo ang matood mong gugma diha sa iyang pagkaanindot og pagkagamhanan.
basin og ang mga langgam nga nanglabay makadungog diay kanimo og ihatod kaniya
og siya mamati kanimo.

basin diay og ikaw usab higugmaon diay niya