mwoahhh

mamahimong ako usa lamang ka balahibo nga imong duladulaan
pinaagi sa pag-tayhop-tayhop sa imong gininhawa bisag dili gikan sa kinailawman sa imong dughan diin imong gipakatulog ang imong kasingkasing

mamahimong gikan lang kini sa kilid sa imong pus-on nga imong ihiyak kon madungog mo ang akong pag-abot pinaagi sa akong mga pangagho

mamahimong imong tahoron kunohay ang akong pag-abot pinaagi sa pag-ukab sa imong baba og dayon sipitsipitan nimo ang akong pulong isip huyang nga balahibo sa imong mga ngabil og dayon nimog ingon

mwoahhhhhhhhhhhhhhh, moahhwahhhhhh

nga morag ikaw nasudlan sa akong gahi og baga kaayong pagbati
nga taas kaayong misurop sa imong pagduladula kanako
diha sa imong dila og

baya sa imong pagkasipyat sa dihang miabre ang imong baba
og imo akong gisipitsipitan sa imong ngabil
mahimong mahikurat ka sa usa ka gilok kaayong pagkuhit

og ako imong malad-ok
diha sa sud sa imong baba ako matulog sa pipila ka gabii

og ikaw mahikatulog sa daghan kaayong mga damgo
nga akong ipabunga diha kanimo

ayaw og kahadlok,
ayaw og pauwat nianang imong mga kabalaka
kay pag-kaugma adunay pula kaayo nga rosas nga mokalit
og gawas sa imong alingagngag nga gitangag sa imong dila

og ang imong mga ngipon mokagot sa tumang kalami
og diha diha makita mo sa imong salamin ang imong maanyag nga hulagway nga nagpaak sa usa ka pula kaayo nga rosas

mopiyong ang imong mga mata og madungog mo ang akong hunghong
nga walay kaikag og sa tumang kayumo moingon nga

gihigugma ko ikaw, gihigugma ko ikaw, gihigugma ko ikaw

kana mao ang tinood, sa makatulo ko kana ihunghong
aron unta ikaw sa akong pagmahal pag-ayo ikaw mabuhong.