panahon na
bulak sa adlaw
nga ikaw manambo na usab sa akong kalibotan
abrihi pagdali og abrihi og dako ang imong bintana aron
malantaw mo ang mga panganod
sa imong hamubo kaayo nga kinabuhi
nga human sa usa ka pagpamuswak
mangalarag dayon ang imong
mga gihay
og manguhulog sa imong tiilan
sama sa usa ka pagmamilok
lamang
wala nimo matagad paghikap
ang langit nga unta
ania na sa imong kiliran
og ako ania karon naglantaw nagbakho sa imong
pagkamatay og ania nag-antos sa pagpamunit sa
imong mga liso gikan sa imong dagway
og buhion pag-usab pinaagi sa
pagtisok balik niini sa imong tiilan.
kay ngano man god
nga wala man nimo
hikapa og dali-dali ang
langit sa dihang
duol na kaayo
kini sa mga aping
sa imong
mga buhi kaayong
gihay?
No comments:
Post a Comment