makahinumdum ka pa ba anang imong
bation kon ikaw mamasol sa usa ka lubog nga sapa
nga dili ka segurado kon anaa bay isda?
sulayan nato paghinumdum....
magsugod kita sa pagpili sa paon
ang wati, nga akong gitusok sa
taga, ug gani miigwad-igwad sa kasakit
nga sa akong kasayuran
mao kanay ganahan kaayo sa
mga dagkong haloan
og dayon natog labay sa
taga nga nakahikot sa taas
nga nylon paingon didto
sa lubog nga sapa
anaa ang atong pagpaabot
walay tingog-tingog kay
basin matugaw ang
mga isda nga atong uwaton
sa usa ka igwad nga wati nga paon
dugaydugay nga panahon.....
makita nato ang pagpanglabay
sa taas og lubog nga sapa
dala ang mga gianod
nga dahon
og usahay
dunay kisaw sa
mga tapay sa
mga isda nga sipat
nga igo rang manglabay og dili mangambat
nga mora lang kita og gilamat
og makaingon kita nga
yamat!
apan mamunga ra baya sa kadugayan ang atong pagpaabot
kay aduna ra gayoy masipyat sa kaigmat og matintal ra
pagkobit og mokaon og motulon sa atong wati nga paon
og mataga ang iyang tilaok og dili na kini makaipsot pa
mohugot moloag ang
atong taas nga bingwit
motagurok ang nylon og sa pag-abot na sa maong higayon
nga hugot na gayod kaayo
birahon na nato ang ang atong pasol
nga nagtangag sa baba sa atong kuha nga isda nianang adlawa.
dili mapalit og sapi
ang atong kahinam niadtong tungora
nga sa usa ka lubog nga sapa anaa pa diay isda nga atong makuha
sulayi og pamingwit sa imong kinabuhi
og sultihi ako sa kahinam nga imong mabati.
ayaw kanang kabahin sa kalaay
sa pag-paabot, palihug, kay gikapoy na ako niana
ilaktod ako niadtong panahon sa pagkubit sa kalipay sa
pagbingwit, kay kana ang akong wala pa kaayo mabati.
No comments:
Post a Comment