pagkawala sa hinay hinay

dugay ang kangitngit
diri sa akong dapit
og nagbalikbalik nagputolputol

og nagpunay usab ako og dagkot
sa dagko og tag-as og puti nga
mga kandila morag
akong halad og lawog
sa iyang kagutom sa
kahayag

mokalit og abot ang kahayag sa
sugang dagitab
og mosayaw ang akong
mga mata sa kahinam sa iyang
naandan og akong
tayhopon ang mga kandila
aron kini mamatay
og dayon magpabilin
kini sa iyang mga aso
nga puti ang iyang
katapusang hunat
og mga ulat
sa iyang kinabuhi

mobawogbawog ang
mga aso nga morag gustong
molikos sa hangin
mosaka sa kisame
mikuyog sa hangin
og dayon sa hinay hinay
nawala nga mora
bag ikaw nagdamgo
sa kalag sa imong
amahan og nabaho
nimo ang iyang
pagkabuhi
og pagkabanhaw
diha sa hardin
sa imong hunahuna

nawala na ang gaamag nga siga
sa pabilo sa kandila
nga morag mata sa iring
sa tunga sa kagabhion
og balikan na usab
nimo ang imong
mga naandan nga
gustong buhaton
diha sa nataran sa kahayag

ingon ana kuno ang
kinabuhi
ingon ana kuno
ang gukod sa
kahayag og kangitngit
ang taral-taral sa
daotan og kaayo
ang dula dula sa
kamaot og kaanyag
ang pagbalik
sa mga patay nga
kagahapon og
ang paghinayhinay
nila og kawala sa
imong atubangan
ang pagsimhot nimo
sa hangin og ang
pagtapot sa usa ka
baho og kahomot
dinha sa ibabaw sa
imong panit

nanimaho kang
kandila sa makadyot
lamang apan
ang panagway sa kandilang napalong nagpabilin
diha sa sulod sa mga lawak sa imong kasingkasing
bisan og nahanaw na
ang kangitngit
og mipadayag na
sa iyang kaugalingong nawong
ang tumang kahayag