sa atong pagpanulat usahay

sa atong pagpanulat usahay moabot usab ang mga panulay
kanang atong bation nga dili man seguro ako kamao nga
mosulat sama niya, nila, og maghisgot ta og ngalan nilang
mga gamhanan, nilang mga hanas na paggaray sa ilang mga
pulong sa pagpili sa ilang mga sambingay sa paghan-ay sa
mga bitoon nga morag dyamante sa korona sa usa ka sikat
kaayo nga rayna og prinsesa. Morag moabot ang pagmahay
nganong wala ko man mahunahunai kadtong iyang gihunahuna
og nganong wala man nako madakpi ang mga pulong nga iyang
nadakpan og dayon iyang gipatik sa iyang mga garay og mugna
nga haskang nindota gayod kaayong pamation og haskang lamia
na dayong tan-awon nga morag kitang tanan gibayaw didto
sa langit kuyog sa mga nanagkanta nga mga anghel,

og usahay moabot ang kalaay ang kasina ang kahiubos nganong
dili man ako sama kanila, nganong dili man pareho ang akong
mga mugna sama sa ila,

ang mga panulay sa pagpanulat, hayy, dili ko na angay nga
ambaton pa. Lingaw lingaw lang kining akoa. Hulip sa mga
panahon nga nagsigig panglabay nga walay gibitbit nga mga
bulak og bunga, apan kon ako gayong tinud-on ang akong mga
mugna nindot ra baya usab nga basahon, daghan baya usab
ako og makitang mga lalom nga sambingay nga usahay og akong
salomon, makakita ra baya usab akog mga perlas og mga
mabulukong mga isda sa bato nga nagpunay og ikyas og tago,

naa baya poy mga luha apan dili na lang pod nako ipakita.