dili ako anghel

dili ako anghel my dear
wala usab ako mangandoy nga ako mamahimong anghel
kay layo ra kana sa akong natural
kay og unsa ako sa akong pagkabata
mao na seguro ako kana usab
sa akong pagkatigulang

sipat, maldito, gahig ulo,
madinumtanon, mao kana ang tawag
sa akong inahan kanako og ako na kanang
gipatik nga morag tato sa akong lawas

adunay panahon nga ako mohikap sa
akong bukobuko nga mora bag gusto nako
nga ako adunay dagko kaayong mga pako
nga mas dako pa sa pako sa usa ka agila
nga bisag wala pa ako makakita og anghel
gusto sab nako nga ang akong mga pako
sama sa naa kanila

gusto nakong molupad ako
paingon sa layo kaayo nga lugar
kanang dili na ako maabtan nimo
kanang usa na lamang ako ka isla
sa akong sirado nga kalibotan
sa tungatunga sa lawod
sa kalimot

ayaw na pangotana pa kanako
wala na akoy ikatubag pa kanimo