goldfish
dako nga isda sa usa ka gamay nga aquarium
gipangga sa mga namuyo dinhing dapita
giamuma, gialisdan ang tubig
sa matag adlaw, gilawgan
sa tempranong oras
gidayeg, gisimba
sa mga bata
ang iyang
kaanyag
nganong mobalhin pa ba siya sa dako kaayong suba?
nga gamay na man siya nga isda didto
og walay mag-atiman kaniya
siya na mismo ang mangita
sa iyang pagkaon
og basin gani siya
pa ang makaon
sa dagkong
isda didto sa dako kaayong suba.
pagkahayahay na niya dinhi
dili na maglabad ang iyang ulo dinhing dapita
maglangoylangoy lang siya
magduladula sa iyang mga kapay
magpasinaw sa iyang mga bulawanong himbis
magpabula lang siya sa iyang baba
apan nganong nagdamgo pa man gayod siya
nga mohawa dinhi sa limpyo kaayo nga aquarium?
nganong mobalhin ka man sa asgad kaayo nga dagat?
No comments:
Post a Comment