naghinuktok ko

naghinuktok ko sa ibabaw sa akong mga notebook og mga libro
akong gitagoan ang akong mga drafts
nakumot ko na ang uban
gilabay sa basurahan akong gidauban

ang akong bangs sa agtang
akong gibalhin sa akong suwang
mibaga ang akong bungot
ang ubang sobra akong gikulangan
angay ra kanang buhaton
sa usa ka nagpursigi nga magsulat
sa iyang mga balak

ang akong bungot
akong gitabon sa akong baba
dili ko mosulti anang mga pait og aslom
walay pulos ang tanan
sa mga nagmata nga gusto nakong pukawon

wala koy gisulti dili na nako sumpayan
og pahiyom ang akong kahilom
tutukan ko ikaw sama sa usa ka walay pagpakabana
kon unsay dangatan sa atong ugma
madam-ag ka ba o ako ba ang mapangka
atong diskarte na kana

dili na ako moukab sa akong libro
wala nay panahon
moabot na ang ulan og sa iyang kabugnaw
ako kang ingnon
tingtulog na sa akong panahon