kagabii ako nagpaabot kanimo

kagabii ako nagpaabot kanimo
sa akong kamingaw
ang akong mga bukton haw-ang
ang akong mga tiil morag napiang
ang akong mga tutok nasayang lang
sa mga kisame nga dili kamaong mobalos
sa akong mga hangyo
ang akong katre walay kainit
ang akong mga habol nagbagolbol
nganong ikaw wala motuman sa atong sabot
mihisyak ang akong gibati nga kahinam
nalup-og ang akong kaulag
didto sa akong mga palad

wala ko moiyak kay wala akoy mga luha
gibagnod ko sa akong mga kamot ang akong kasilag

langto ang baho sa akong mga damgo
sa dihang ako nakatulog sa akong kapakyasan

ang akong mga laway nga unta nagtabisay
sa pagpaabot sa imong kaanyag
intawon nauga sa akong alugnan nga nagmahay

nahigugma ka pa ba kanako?
sultihi ako kay ang mga buyog dili na makaabot sa imong pagbuswak.