kon maghisgot ka og kamatooran
mora bag wala na lang juy laing bililhon
ining atong kalibotan
kondili ang kamatooran na lang gayod
busa ikaw mopasidaan
nga wala kay labot
kon kinsa ang masakitan
kahadlok ba nimong manulti
morag ikaw lang seguro ang
kamatooran nga walay gitago
nga mga bakak sa imong kinabuhi
hinayhinay lang,
og sa suban-on pa nakong amigo
samtang mikatkat
kami sa habog nga bukid sa Malindang
samtang ako mihangak
sa pipila ka lakang lamang
siya kanunay mopahimangno kanako,
"Maya-maya lang sir!Moabot ra lagi kita didto
sa dili pa mosalop ang adlaw"
ang pagkatkat sa bukid sa kamatooran
dili baya malalim higala
maayo lang kon ang imong mga kamatooran
anaa sa mga patag, sa mga gagmayng lam-aw,
sa mga human nang daang karsada
diin wala nay dampason og limpyohan
sayon ra kaayo kanang lakton,
abton, dawaton og gakson
apan higala adunay mga kamatooran
nga atua pa sa tumoy sa bungtod
sa tumoy sa bulkan nga gaalboroto
kay gusto na nga moboto
nga kita ania pa intawon
sa iyang tiyan og ang uban atua
pa intawon sa iyang tiilan nga og atong paspasan
sa dili pa kita moabot sa pagdawat sa tanan, kining dakong bulkan moboto
sa dili saktong panahon og kita dinhi nga nanglimbasong pa intawon
isulti ko kanimo, otrohon ko,
nga kita dinhi nga dili pa gayod andam,
kitang tanan, higala,
magdungan gayod og pangamatay.
og kon mahitabo kini higala,
kinsa pa ba ang manghilak sa
atong kaparotan, sa atong kapakyasan
tungod nianang imong pagdali-dali
og sugid kabahin sa kamatooran?
No comments:
Post a Comment