kahinaman

ang kahinam sa bata sa iyang inahan
unsaon mo paglarawan?
balika kadtong hago ka kaayong
nagtudlo sa tulunghaan diin sipat
kaayo ang mga grade one,
kadtong naglabaylabay og papel
nga airplane si germanico jr.
diin nasabod ang pako sa imong
simod, og kadtong si Serifica
nga nakaigit sa daghan kaayong
borgor nga gikilaw, og si
Doroteo nga milanlan sa gatas
nga donated sa United Nations
og kadtong si Luciano nga
ginodnod ang libring butter
gikan sa America dinha sa iyang
mga aping? sakit sa dugha ang
pagtudla sa grade one, tua pa
si Brandon, nga sa kaanindot
sa iyang ngalan, nawala ang
ka-cute sa dihang nakaigit
sa iyang lingkoranan, og sa
pag-abot sa kahaponon, sa
paglakat nimo paingon sa inyong
balay, duha ka kilometro, nagdali
ka kay wala ka kadala sa imong
payong, og miabre ka sa inyong
pultahan, diin ang imong bana
naghungit sa gerber sa baba
sa imong usa pa ka tuig nga
anak nga babaye nga ang ngalan
Maria Gloria.

Mao kana ang akong larawan
og sugilanon sa usa ka
kahinaman.Carbon copy
ang imong agtang sa iyang agtang.