mga nanay lang ang nasayod

mga nanay lang ang makasabot sa ilang mga anak
labi na ang mga lalake kon unsa ang makalipay kanila
nga kon magminyo na gani sila sa ilang
mga nakita nga kapikas
nga wala magustuhi sa ilang mga amahan
anaa ang mga nanay nga magpatunga
sa paghatag sa tambag og maymay aron lang matuman
kon unsa gayod ang makalipay sa anak
og unsaon pagsulbad ang mga babag
og sa kaulahian mamati ang mga tatay
og motamod na lang sa kalipay sa anak tungod sa nanay
bisan dili unta angayan

apan anaay panahon nga ang gusto sa iyang anak nga lalake
dili gayod madawat sa iyang amahan og ang inahan mosulay
na usab og patunga, tambag, pauyon-uyon og tan-awon
kon asang dapita magtakbo ang mga hunahuna og mga pagbati sa mga anak og mga amahan
mibalibad ang tatay nga dili na gayod kini mahimo
og ang anak nga lalake mobiya na lang sa ilang
panimalay aron pagtuman sa hunghong sa iyang
kasingkasing
moadto kini sa lugar nga dili na siya makit-an
bisan ang iyang anino nga dili na mabati
og ang amahan dili na mangita
og magsubay pa kon unsa na ang iyang gidangatan

apan ang inahan nasayod kon asa na ang anak nga nagtuman og nagbangotan
sud sa iyang kasingkasing iya kining nakit-an
kay puhon iya kining
adtoon aron buligan ang iyang ginadili nga kalipay.