dili mo angayan nga ako higugmaon

sayod ako nga ako imong gihigugma
nabati ko kana sa imong paghalok sa akong mga anino sulod sa imong damgo
kagabii,

nagbasol ko nga ikaw akong gipakita sa akong hulagway
diha sa kilid sa akong mga pulong,
kay sayod ako nga ako dili angayan
nga imong higugmaon

unsaon ba nimo paghigugma ang hangin?
ang aso sa mga kalayo nga kadyot lang kaayong
mihatag kanimo sa kainit sa kabugnaw
nga atong gisaloan
kagabii,

sulod sa imong lawak imo akong hinumduman
sa laing hulagway kanang imo akong kasilagan
usa ka nilalang nga nagpunay og panigarilyo,
usa ka aso nga motuok sa imong liog og molanag sa imong tutunlan
kanang ikaw gustong kuhaan sa ginhawa sa imong kinabuhi,

nawong nga nagtago
sa kangitngit sa iyang takuban,
dili na kini molantaw kanimo,
molakaw na kini sa halayong dapit,
ayaw na kini siya sunda sa iyang mingaw kaayo nga panaw,

palihug ayaw,
bisan sa mga damgo,
kasilagi ako,
dili ako makahatag kanimo og kinabuhi,
wala na ang akong lawas sulod sa imong damgo,

wala na,
bisan og usa ka dahon lamang,
silhigi ang mga upos,
ayaw ako hinumdumi diha sa usa ka

sigarilyo.