mY secreT ponD

mag-ila ila ta
tug-an sa ngalan og dis-a gikan
og unsay atong mga gusto
og dili gusto
og hatag usab sa ngalan sa atong
mga kaila og barkada
og asang eskwelahan
og asa ang atong gipuy-an

lahi ang pag-ila-ila sa atong kaugalingon
kay wala kitay kasugiran
og wala kitay kapangutan-an
og moingon kita nga
unsa may akong ilailahon sa akong
kaugalingon nga nasayod naman ako
sa tanan bahin kanako

ang akong ngalan
dis-a ako gikan asa ako nagpuyo
og unsay akong mga gusto og dili gusto
og kinsa ang akong mga higala
og mga kontra

apan moabot ang panahon nga makita
nako ang nawong nga dili akoa
ang akong mga gusto nga dili nako gusto
ang akong mga pangandoy nga sukwahi sa akong pangandoy
og makaingon ako
nga wala na ako makaila sa akong kaugalingon

og nagsugod akog pangutana
kinsa diay ako?

mao kana ang sugod nako sa pagpamilosopiya
ang akong pagkawalay nahibaw-an
ang akong pagkatanga sa mga butang nga wala nako
nakita atbang sa akong agtang
ang akong nahikap nga wala nako mabati