kon ikaw naghandom ka sa mga dahon sa laurel

higala ko kon asa ka na gipadpad
karon sa hangin sa imong mga kahiubos
palihog lang og tigom og gamay nga kwarta
og paningkamot nga makaabot ka sa usa ka lawak
sa kinadol-an nga internet cafe diha
sa kinadul-an nga lungsod sa bukid nga imong gitagoan
karon adlawa kay og ikaw pa ang pasultion

internetless ka karon, not the onliner type,
just trying to situate yourself
finding your niche
searching for

kanang usual line sa mga nawad-an na sa kahubog,

yourself.
soul searching karon imong gigs,

well and good,

sayod ako sa imong kahiubos
kay gusto man god nimong kab-oton ang langit
bisan og mugbo pa ang imong mga kamot
og ang imong mga pako mora pa kadak-a anang mongo sprout kadtong imong paborito nga orderon sa rai-rai ken

unsaon ba nimo pagkab-ot ang langit
kon dili pa kaayo hanas ang imong lawas sa pagpagawas og pagpasulod balik sa imong kalag?

naibog ka ba sa mga laurel nga anaa
sa ulo sa imong higala nga bayot?

sus kataw-anan ka, nahimuot ko pag-ayo nimo,
kadaghang laurel leaves nga ana sa kusina ni maria,
kadtong iyang isagol niya aron mahumot ang iyang niluto nga humba,
mas humot pa kana kaysa mga ganti sa entablado og sa mga pakpak nga imong gidamgo ng imong madungog

ayaw na anang sinasina, kay kon ikaw naghandom anang mga dahon sa laurel aron ilang ipurongpurong sa imong sinaw kaayong agtang

ako kang ingngon nga ikaw walay pulos
mora kag balayan sa posporo nga nagpasikat sa dapog
kay kuno si Jose Rizal diha lang gihapon nagpuyo sa iyang dughan.

balikon ko

kita nga ania dinhi mao
ang mga tinood nga ganti sa atong kaugalingon
nadawat na kana nato sa dihang gitagaan kitag katungod sa pagsulod nga buhi dinhing dapita

busa ang atong buhaton mao na lamang
ang pagpakabuhi nga mapasalamaton
maghalad sa atong mga balak,
magpaambit og mga kalipay diha sa atong
mga silingan nga anaa ay,

nagsigig hilak yungit kaayo sa ilang mga pagbakho
nagmahay kay nganong mubo kuno kaayo ang ilang mga dila.