kita nga nagtugaw sa kagabhion

kita kadto ang nagtugaw sa kagabhion
nga sa dihang natulog na siya kita ang mitindog og
naglantaw sa lalom nga lawod sa kangitngit sa unahan

og milingkod kita sa usa ka silya tapad sa usa ka lamesa
og atong giantosan og tutok ang gamay kaayo nga kahayag sa atong atubangan
nangayam sa mga pulong, gilaray, gibalay
ang mga panghupaw gipanday ang mga pangagho,
gilansang ang mga kasuko, gisipilyahan ang mga kalibog,
gipipi ang mga nilapas, gigabas ang mga dili angayan,
mipahulay sa ginagmay og namati sa paglabay sa hangin, naghinuktok, nangalot sa mga dili katol sa atong ulo,
giduladulaan ang atong alimpulo, nangagho, mipaak sa wait, nanghupaw,

gustong mobalik sa mga panid sa kagahapon,
naghinumdom, nangita sa mga rason, nagpahimutang sa mga nanglabay og sa mga umaabot,

kita kadtong nagtukaw sa kagabhion
samtang sila nahinanok sa pagkatulog nanaghagok
kita kadtong nagtukaw,
kita kadtong dili na ganahan unta nga mapakyas.